Prishtinë, 12 shtator 2024

Me nismën e Departamentit të Antropologjisë të Fakultetit të Filozofisë, të Universitetit të Prishtinës “Hasan Prishtina”, Biblioteka Kombëtare e Kosovës ka pranuar një kontigjent të librave dhe të revistave nga Biblioteka e Karl Kaser, Graz, Austri.

Koleksionet e Bibliotekës Karl Kaser janë lënë si testament për Bibliotekën e Institutit të Historisë, Qendrës për Histori dhe Antropologji të Evropës Juglindore, aty ku ka punuar si profesor dhe udhëheqës i Qendrës.

Me vullnetin e shprehur nga përgjegjësja e kësaj biblioteke, znj. Michaela Wolf, një pjesë e këtij fondi është dhuruar për Bibliotekën Kombëtare të Kosovës dhe Departamentin e Antropologjisë.

Koleksionet e pranuara, paraprakisht janë përzgjedhur nga profesionistë bibliotekarë të Bibliotekës Kombëtare të Kosovës dhe të Departamentit të Antropologjisë, këto koleksione i përkasin fushës së historisë, antropologjisë, sociologjisë, shkencave politike dhe shkencave sociale, e dijeve humane në përgjithësi. Librat janë në gjuhë të ndryshme: anglisht, gjermanisht, më pak shqip dhe në gjuhë të tjera sllave.

Të gjitha njësitë e pranuara do të arkivohen në Bibliotekën Kombëtare të Kosovës, për t’ju nënshtruar procesit të përpunimit nga profesionistë të bibliotekës, në mënyrë që të vihen në dispozicion për përdoruesit e saj.

P.S.: Karl Kaser ishte historian dhe antropolog. Gjatë karrierës së tij akademike, Kaser ishte i njohur për studimet e tij në histori dhe antropologji të Evropës Juglindore, përfshirë shqiptarët.
Karl Kaser ka udhëhequr projektin kërkimor “Familja Kosovare e Rishikuar” (2010-2015), në Qendrën për Histori dhe Antropologji të Evropës Juglindore.

Biblioteka Kombëtare e Kosovës shpreh mirënjohjen e thellë për kujdesin dhe vullnetin për ta pasuruar Bibliotekën Kombëtare me këtë koleksion.